NAVENDA NÛÇEYAN - Xizmên windayan û ÎHD'ê li çar bajaran li aqûbeta windayan pirsîn û doza edaletê kirin. 

 

Xizmên Windayan û Komeleya MAfên Mirovan (ÎHD) li Amed, Êlih, İzmir û Colemêrgê li aqûbeta windayan pirsîn û xwestin kiryar bên darizandin. 

 

AMED

 

Xizmên Windayan û rêveberên Şaxa Komeleya Mafên Mirovan (ÎHD) a Amedê di hefteya 877'emîn de çalakiya “Bila winda bên dîtin kiryar bên darizandin” li pêşiya Bîrdariya Mafê Jiyanê ya Parka Koşûyolû ya Amedê li dar xist. Di daxuyaniyê de endam û rêveberên ÎHD'ê û Xizmên Windayan û Komeleya Piştgirî û Yekitiyê ya ji bo Kesên Xizm û Nasên xwe li Dergûşa Şaristaniyê Windakirinê re (MEBYA-DER) a Amedê û gelek tev li daxuyaniyê bûn.

 

Xizmên Windayan û beşdar pankarta ku wêneyê windahiyan li ser bû jî li erdê hat raxistin û wêneyên kesên ku hatine windakirin hildan. Vê hefteyê li aqûbeta Ender Togcu ku ji 29'ê Mijdara 1994'an vir vê agahî jê nayê girtin, hat pirsîn. Beriya daxuyaniyê Serokê ÎHD'a Amedê Ercan Yilmaz axivî û diyar kir ku duh salvegera kuştina parêzer Tahir Elçî û hefteya derbasbûyî salvegera kuştina Şevket Epozdemîr bûye û got ku kuştina wan jî bêceza hat hiştin.

 

Hevserokê Giştî yê ÎHD'ê Cîhan Aydin jî anî ziman ku ew dê her piştgiriya Xizmên Windayan bikin û got: “Dewlet dîwaran li pêş edaletê datîne. Gel rastiyê dixwaze. Tevî daxwaza edaletê jî wîjdan tune ye û her kes kor e. Em hêvî dikin di vê pêvajoyê de faîlan derxin holê û bên cezakirin.”

 

Endamê Komîsyona Windayan a ÎHD'a Amedê Firat Akdenîz daxuyaniya hefteyê xwend û diyar kir ku Ender Togcu zewicî bûye û zarokek wî hebûye. Firat Akdenîz anî ziman ku Ender Togcu ji bo biçe nexweşxaneyê ji malê derketiye lê li gor gotina dayika wî Ender Togcu qet neçûyê nexweşxaneyê. Firat Akdenîz wiha got: “Heman rojê di seat 22.30'yan de polîs bi ser mala bavê Ender Togcu de digirin û tundiyê li bavê Ender Togcu, Huseyîn Togcu û zarokên wî dikin. Piştre jî bavê Ender Togcu agahî digire ku kurê wî di dest polîsan de ye.”

 

Firat Akdenîz qala geşedanên bûye re kir û got ku tevî 31 sal bi ser bûyerê derbas bûye jî jî aqûbet nehatiye ronîkirin. Firat Akdenîz diyar kir ku tevî hewldanên malbatê yên hiqûqî jî tu encam nehatiye girtin û axaftina xwe wiha bi dawî kir: “Birayê mezin ê Ender di dema binçavkirina xwe de qêrîn û dengê Ender bihîstiye. Birayê wî yê mezin, Alî Togcu, di roja sêyemîn de li ser rêya Erxenê hate berdan. Bavê wî Huseyîn Togcu piştî windabûna kurê xwe, her meh serî li Serdozgeriya Dadgeha Ewlehiya Dewletê da, lê ji wî re hate gotin ku kurê wî nehatiye binçavkirin û tu qeyda binçavkirina wî tune. Birayê wî yê mezin jî bi devkî serî li Qereqola Polîsan a Çarşiyê da. Tevî hemû hewldanan û têkoşîna 31 salan jî hîn aqûbeta Ender Togcu nehatiye ronîkirin.”

 

Çalakî ji bo Ender Togcu û hemû windayan bi deqîeyeke çalakiya rûniştinê bi dawî bû.

 

ÊLIH

 

Çalakiya ÎHD û xizmên windayan li Êlihê di hefteya 713'an de li ber Abîdeya Mafên Mirovan a li ser Kolana Gulistanê berdewam kir. Di çalakiya vê hefteyê de li kiryarên Serokê Baroya Amed Tahir Elçi ku di 28'ê Mijdara 2015'an de li ber Mînareya Çar Ling a navçeya Sûrê ya Amedê di êrişeke çekdarî de hatibû kuştin, hat pirsin. 

  

Daxuyanî bi çalakiya rûniştinê bi dawî bû.

 

ÎZMÎR

 

Şaxa ÎHD'ê ya Îzmîrê çalakiya xwe ya du hefteyî ya "Bila winda bên dîtin, kiryar bên darizandin" li ber Sumerbanka Kevn a li Konakê berdewam kir. Di daxuyaniyê de pankartên bi nivîsa "Winda wijdan in, xwedî li wan derkevin" û "Winda diyar in, sûcdar li ku ne?" hatin hildan. Di çalakiyê de li aqûbeta Abdulselam Çelik ê ku di 6'ê Mijdara 1997'an de li Amed'ê hatibû revandin û Abdullatif Yagizay ê ku di Mijdara 1995'an de hatibû revandin, hat pirsin.

 

Di daxuyaniyê de hat destnîşankirin ku heya kiryar neyên darizandin dê têkoşîn bidome. 

 

COLEMÊRG

 

Şaxa ÎHD ya Colemêrgê û xizmên windayan ji bo hefteya 203'yemîn a çalakiya xwe li Kolana Hunerê ya navçeya Gever a Colemêrgê kom bûn. Di çalakiyê de pankarta bi nivîsa "Bila winda bên dîtin, kiryar bên darizandin" hat vekirin. Di daxuyaniyê de wêneyên windayan hatin hilgirtin. Vê hefteyê, xizmên windayan ji bo Abdulselam Şahin ku di sala 1993'yan de hat kuştin, edalet xwestin.

  

Daxuyanî bi çalakiya rûniştinê bi dawî bû.